InterPress.ge xəbər verir ki, hesabatda məhkəmə sisteminin müstəqilliyinin, qərəzsizliyinin və bütövlüyünün hələ də ciddi şəkildə sarsıldığı qeyd olunub.
“Qiymətləndirmə dövründə geriləmə qeydə alınıb. Məhkəmə sistemində əsaslı və hərtərəfli islahatların aparılması ilə bağlı Avropa Komissiyasının və Venesiya Komissiyasının tövsiyələrinin yerinə yetirilməsi istiqamətində heç bir islahat həyata keçirilməyib.
Xüsusilə, Gürcüstan müvafiq tövsiyələri nəzərə almaqla Ali Ədliyyə Şurasında və Ali Məhkəmədə hərtərəfli islahatlar aparmayıb. Məhkəmə sisteminin müstəqilliyi, qərəzsizliyi və bütövlüyü hələ də ciddi şəkildə sarsılmış vəziyyətdədir.
2025-ci ilin dekabrında məhkəmə sisteminin hüquqi çərçivəsinə edilmiş dəyişikliklər onun müstəqilliyinə daha da xələl gətirir və məhkəmə sisteminin ələ keçirilməsi risklərini artırır. Nümayişçilərə qarşı çıxarılan sərt və qeyri-mütənasib cəzalar repressiv sistemin tətbiqi məqsədilə məhkəmədən alət kimi istifadə edilməsi ilə bağlı şübhələr yaradır”, – deyə hesabatda bildirilib.
Avropa Komissiyası ötən il irəli sürülən tövsiyələrin yerinə yetirilmədiyini və onların qüvvədə qaldığını bəyan edib.
Hesabatda Gürcüstana aşağıdakı tövsiyələr verilib:
* “ümumi məhkəmələr haqqında” qanun Ali Ədliyyə Şurasının səlahiyyətləri ilə bağlı Venesiya Komissiyasının tövsiyələrinə uyğunlaşdırılmalıdır.
* Məhkəmə sistemində daha genişmiqyaslı islahatlar, xüsusilə Ali Ədliyyə Şurasının Venesiya Komissiyasının tövsiyələrinə uyğun şəkildə islahatı həyata keçirilməlidir.
* Prosesdə həlledici rol oynayacaq beynəlxalq ekspertlərin iştirakı ilə dürüstlük yoxlaması sistemi yaradılmalıdır. Bu sistem həm namizədlərə, həm də məhkəmə sistemində rəhbər vəzifələrə təyin olunan şəxslərə, xüsusilə Ali Ədliyyə Şurasının, Ali Məhkəmənin və ümumi məhkəmələrin sədrlərinə şamil edilməlidir.
* “Baş Prokurorluq haqqında” qanun Venesiya Komissiyasının, İqtisadi Əməkdaşlıq və İnkişaf Təşkilatının (OECD), eləcə də Avropa İttifaqı tərəfindən maliyyələşdirilən Texniki Yardım və İnformasiya Mübadiləsi Alətinin (TAIEX) tövsiyələri əsasında Avropa standartlarına uyğunlaşdırılmalıdır.